SHARE
Cerita di rubrik "Adong-adong Sajo" ini hanya hiburan akhir pekan, “tarsongon ubat ni lungun tu huta, utamona tu koum na i luat ni halak”. Jika ada kesemaan nama dan tempat, hanya kebetulan. Gambar yang ditampilkan juga hanya ilustrasi.

DISADA borngin topek buse malam Jumat, ira-ira pukul 21.30, tibo-tibo matubek-bek umak Butet. Ngabinoto sanga aha salana, cup-cap songoni ira-ira amporik sikodit nabaru songgop i sarangna i batang pining sundari.

Marsitutu doma, mocom-mocom ningia, “Nahebat mantong nasib on da, inda mangarti iba jiba..” ningia.

“Indape dia natudia mamate. Hum nai muloi dope ma galang buse ilala baya. Na atagianna dope..,” ning umak Butet.

Sip songoni ayah Butet mambege obar ni umak Butet. Ipatorus ia mangabiskon kopi na ijolo nia i, purak-purak inda i begesa. Na i boto ia dontong sifat ni  Boreg i, anggo i balas obar nia, mur ma jadi dei.

Ayah Butet pentong sabangso naparsobar do on, nabisuk, dohot napohom halakna . Bope songoni, manombo ro dei i bagasan ni ate-ate nia ba,” Pardokoni jo umak Butet, loja ho antak.”

“Oisdah, na nasib ma baya nasib on. Um na atagianna dope ilala mamate. Songon nasib ni si pege lambang doma baya ulala. Tolong malanga Tuhan hamba mon,” ning umak Butet tarsongon namarsitogol doma.

Baen na mur majadi-jadi  obar ni Boreg i, rupana inda tahan ayah Butet be mambegesa. Akhirna mago juo do kasabaran nia, apalagi songon na manyindir bage obar ni umak Butet.

“Aha do nanga nimu umak Butet? Pupu soni matubekbek ko. Ana bahat ulala kecekmu saborngin on. Tar songon namanyindir ulala. Na tu au  dei dongan maksudmi,” ning ayah Butet.

“Olontong..!! Indape jia natujia,  nabaru ijama dope ma mate. Hum  a tagianna dope. Nangkin namangolu do, ma mate. Galang doma baya i lala. Baen nasoho dei dabo abang….” ning umak Butet i  golap golap i.

“Aha do nanga na matei. Pupu soni namate ningmu,  mate.. mate.. nimu. Aha do namatei langa..” ning ayah Butet tarsongon namanyonggak sotik.

“Aso mangamuk ko baya abang idokon mate. Lampu listrik on do dabo namatei. Atagianna dope ilala namanggosok pakean on mamate, galang doma ilala. Gari masalose karejo niba, tinggal margulung-gulung doma ita,”  ning umak Butet songon na mambela diri.

“Astagfirullohh, lampu do langan namate i. Uambang dabo nangkin sanga aha namatei,” ning ayah Butet na laos manjontik umak Butat ma.

“Keta tu si e bo. Anta namanyogot doma so mangolu lampu on, tutup pintu bo, na i dolok ubege modom si Butet dohot bouk nia,” ning bayo Nasution i.

“Gosohhhh…, na poso dope ari, “ ning umak Butet, ia pe na laos jonjong ma pature daster yukensi nia namasibak ira-ira i toru ni katiak nai.

Indajaube…(z.pulungan)

SHARE

LEAVE A REPLY

Please enter your comment!
Please enter your name here